Åniájggásasj stivrrim bargos viesso unneplågogielajs
Mij lip guoradallam stáhta dåjmav doarjjomijn nasjonála unneplågogielajt. Dánna vuollelin dån máhtá oadtjot åna tjoahkkájgessusav.
Svierigin li jiddisch, suobma, meänkieli, romána chib ja sámegiella li dåhkkidum nasjonála unneplågogiellan. Gájka adni riektáv ságastit sijá gielav, danen gå giella ållu la ájnas oasse iesjvuodas. Unneplågogiela li aj oasse svieriga kultuvras ja kultuvrraárbes. Danen la stáhta válldám suv ámmádin doarjjot ja bisodit nasjonála unneplågogielajt.
Rijkarevisjåvnnå la guoradallam gåk muhtem fábmudagá barggi vaj bisodit nasjonála unneplågogielajt. Da fábmudagá li instituhta giella ja álmmukmujtto (Isof), Lenastivrra Stockhålma lenan, Lunda universitehta, Sámedigge, Stáhta skåvllåverka, Stockhålma universitehta, Södertörna allaskåvllå, Universitehta- ja allaskåvllåráde (UHR) ja Ubbmema universitehta.
Rijkarevisjåvnå boados la vaj stáhta dåjma ássjes älla nuohkása. Dasi nali máhttá stáhta adnet sijá dårjajt ienep dåjmalattjat, dajna vaj juohket dårjav guhkep ájggáj farra gå åna ájggásasj dåjmajda.
Rijkarevisjåvnnå dan diehti ävtot ráddidusáv vaj stivrrit sijá fábmudagájt ienebut guhkaájggásasj vuoge milta, nåv vaj oadtju dahkat guhkep ájggomusmáhttelisvuodajt. Dat sisadná Skåvllåverka ámmádav vaj biedjat aktij åhpadusáv vaj doarjjot dagov oahppamnävojda unneplågogielajn, Isof:a åvdåsvásstádus giellaguovdos, ja Lenastivrra Stockhålma ja Sámedikke bärrájgåhtsem dårja bargojn.
Rijkarevisjåvnnå aj ävtot åvdåsvásstediddje åhpadussajijt ja UHR buoret diehtojuohkemav ja gåk máhttelisvuoda li sjaddat åhpadiddje unneplågogielajda. Dasi nali bagát Rijkarevisjåvnnå vaj ráddidus sirddá web-biele åvdåsvásstádusáv Minoritet.se Lenastivraj Stockhålma lenan jali ietjá hiebalasj fábmudahkaj, manna l doajmma dahkat bielev álkkebun addnijda.