Kortsiktig styrning aschter mengrepa gla jiddro minoritetschib
Vorsnos kamma jurat statens mengrepa gla te främja dova minoritetschiba. Kaj tele nascht diro le pasch aschter jekh kutti sammanfattning.
Dre Schwedo honkar jiddisch, finska, meänkieli, romanichib ta samiska prinschano tjakkes themeske minoritetschib. Sass kamma tjattschot te rakkra siro chiba, ta chib honkar jekh baro botta aschter siro identitet. Minoritetschiba aschar ninna jekh botta aschter dova Schwedigo kulturen ta kuturarvet. Doj gla kammar staten lett pre siro te riggra dova themske minoritetschiba jiddro.
Riksrevisionen kamma jurat so jekh var beddoni mengrar gla te kamma dova themeske minoritetschiba. Kavva beddoni aschar Institutet gla chiba ta folkminnen (Isof). Länsstyrelsen dre kaschtaforo them, Lunds universitet, Sametinget, Statens skolverk, Kaschtaforo universitet. Södertörns högskola, Universitetets-ta högskolerådet (UHR) ta Umeå universitet.
Riksrevisionens slutssats honkar te statens mengrepa chi aschar dosta. Ta nascht Staten kamma siro mengrepa but latscho, palla te parra dolle tele jekh langsno tija dre stället gla dre kutti satsningar.
Riksrevisionen putscha dojgla te regeringen ler siro beddoni pre jekh but langsno dikkepa, tjakk te lengero fyssa fedder paleringsförutsättningar. Dova aschar Skolverkets mengrepa te kera kettane sikkrepa ta främja kerepa aschter drabbrepa dre minoritetschiba. Isofs ansvar gla språkcentrum, ta Länstyrelsen dre kaschtaforo them ta sametingets uppföljande ta stödjande mengrepa.
Riksrevisionen putscha ta tjakkes te ansvariga drabbrepahispa ta UHR kera fedder informationen palla sar möjligheterna te bliddra drabbrare dre minoritets chiba. Ta rekommenderar Riksrevisionen te regeringen kera vri ansvaret gla webbsteddom minoritet.se to Länstyrelsen dre Kaschtaforo them vai jekh vaver fedder beddoni, tjakkes ler dre mengrepa te kera rigga but användarlatscho.