Riikinrevisuuni – valtion toiminasta riippumaton tarkastaja
Riippumattoman tarkastuksen kautta met annama tietoa mihinkä valtion rahat menevät, kunka tehokhaasti virastot tekevät töitä ja johtavatko polittiset päätökset siiheen mihinkä net olit tarkotettu.
Kaikila oon oikeus saaja tiethoon kunka valtio hoitaa työnsä
Sie häyt pystyä luottamhaan ette otettut päätökset nouatethaan ja ette verorahoja käytethään tehokhaasti. Meän tarkastuksitten kautta met eesautama avomuutheen kunka valtion toiminta toimii.
Riikinrevisuuni oon valtiopäivitten alla oleva virasto. Meän tehtävä oon ette ottaa selvää kunka hyvin valtion toiminta toimii. Met tarkastamma hallitusta, valtiolisia virastoja ja muita toimintoja jokka käsittelevät valtiolisia varoja. Meän tarkastukset auttavat valtiopäiviä ottamhaan päätöksiä. Se oon tieto, jotako mennee käyttää ette parantaa hallituksen ja virastoitten työtä.
Meän ittenhäisyys oon peruslaissa
Riikinrevisuuni oon tärkeä osa valtiopäivitten kontrollivallasta. Meän vastuu oon ette antaa valtiopäivile ja ylheisölle tietoa kunka virastoita ohjathaan ja kunka hyvin polittiset reformit toimivat.
Ette revisuuni oon opjektiivi ja asialinen met olema riippumattomia hallituksesta ja muista virastoista, ja meilä oon ynikki mantaatti ette ittenhäisesti päättää mitä met tarkastamma ja kunka met totheutamma tarkastuksia.
Riikinrevisuunin tarkastukset
Met tehemä kahen sorttisia tarkastuksia:
- Met tarkastamma kaikitten valtiolisitten virastoitten vuosiselostuksia ette varmistaa ette niilä oon heän ekonomii järjestyksessä.
- Met tarkastamma kunka hallitus ja virastot totheuttavat sitä politiikkaa jotako valtiopäivät oon päättänheet, esimerkiksi polittisitten reformitten vaikutuksia.
Meän työn tulos
Meän tarkastusraportit julkasthaan avomesti ja tulevat osaksi valtiopäivitten työstä ette tarkastaa hallitusta. Niitä käytethään kansa virastoilta, tutkijoilta, jurnalistiltä ja muilta jokka halvaavat seurata kunka valtio käyttää verorahoja.
Meän työn tulos näkkyy kansanvälisestikki. Met olema matkassa kehittämässä stantartia revisuunissa ja tuema muitten maitten revisuunivirastoitten kehitystä osana ruottalaisesta avustuksesta.
Onkos sulla kysymyksiä?
Jos sulla oon kysymyksiä sie olet tervetullu ottamhaan meän kansa yhtheyttä.
Elävitten minuriteettikielitten työn lyhyaikhainen ohjaus
Met olema tarkastanheet valtion toimia ette etistää kansalisia minuriteettikieliä. Tässä alla sie saat lukea lyhykäisen yhtheenveon.
Jiddiksenkieli, suomenkieli, meänkieli, roominkieli ja saamenkieli oon tunnustetut kansalisiksi minuriteettikieliksi Ruottissa. Kaikila oon oikeus puhua ommaa kieltä, ja kieli oon useasti tärkeä osa omasta itenttiteetistä. Minuriteettikielet oon kansa osa ruottalaisesta kulttuurista ja kulttuuriperinöstä. Sen takia valtio oon ottanu tehtäväksi ette pittää kansalisia minuriteettikieliä elävinnä.
Riikinrevisuuni oon tarkastannu kunka jokku virastot tekevät töitä ette säilyttää kansalisia minuriteettikieliä. Net virastot oon Instityytti kielile ja kansanmuistoile (Isof), Lääninhallitus Stokholmin läänissä, Lundin yniversiteetti, Saamekäräjä, Valtion koululaitos, Stokholmin yniversiteetti, Södertörnin korkeakoulu, Yniversiteetti- ja korkeakouluraati (UHR) ja Uumajan yniversiteetti.
Riikinrevisuunin lopputulos oon ette valtion toimit ei ole riittäviä. Sitäpaitti valtio saattaa käyttää heän resyrsiä enämpi tehokhaasti, jakamalla niitä pitemälle aijale sen siihaans ko tehhä lyhykäisiä satsauksiaa.
Sen takia Riikinrevisuuni ehottaa ette hallitus ohjaa heän virastoja enämpi pitkänaikhaisesti, ette net saavat parempi suunitteluehotuksia. Tämä jällaa Koululaitoksen tehtävvää ette järjestää koulutusta ja etistää oppimateriaalin tuotantoa minuriteettikielissä. Isof:in vastuutta kielikeskuksille ja Stokholmin läänin Läänihallituksen ja Saamekäräjän ylösseurantia ja tukevaa tehtävvää.
Riikinrevisuuni ehottaa kansa ette vastuuliset oppilaitokset ja UHR parantavat informasuunia maholisuuksista ette tulla opettajaksi minuriteettikielissä. Sitäpaitti Riikinrevisuuni suosittellee kansa ette hallitus siirtää vastuuen webbipaikasta Minoritet.se Stokholmin läänin Lääninhallitukselle elikkä muule sopevalle virastolle, joka saapii tehtäväksi ette tehhä sivua enämpi käyttäjäystäväliseksi.