Riikinrevisuuni kahessa minutissa

FILMIN SISÄLTÖ TEKSTISSÄ

Yhtheiskunta muuttuu jatkuvasti eri polittisitten päätöksitten mukhaan – päätökset jokka vaikuttavat sinua suohraan sinun arkipäivässä, ja jokka helpottavat, mutta kansa rajottavat sinun elämää.

Se saattaa esimerkiksi olla kyse:

• mitä oikeuksia ja velvolisuuksia sulla oon kansalaisena,
• kunka eri veroja ja maksoja muotoilthaan,
• kunka sie pärjäät sinun elanon kansa ko sie et saata olla töissä,
• kunka sie saatat olla varmana ette ruokatavarat elikkä lääkheet ei ole vaaralisia,
• kunka met puolustamma itteä jos sattuu konflikti.

Nämät ja muut päätökset otethaan valtiopäiviltä, hallitukselta ja suunile 300 valtioliselta virastolta joitten tehtävät oon ette tarjota yhteiskuntapalvelua, ja tarkistaa ette sääntöjä ja päätöksiä nouatethaan.

Mutta kunkas sitä tietää ette virastot oon tehokhaat ja ette net tekevät mitä net pitävät tehhä? – Joo, sitä häätyy huolehtia. Se se oon revisuuni.

Riikinrevisuuni oon virasto jollako oon peruslakisuojattu riippumattomuus. Meän tehtävä oon ette tarkistaa koko valtiolisen toiminan – hallituksen, virastot ja net puulakit joitako valtio omistaa. Met yytvärteeraama polittisitten reformitten seurauksia ja met saatama nähhä jos verorahoja käytethään tehokhaasti.

Riikinrevisuunin webbipaikala sie löyät kaikki meän tarkistusraportit, jokka selvittävät eri aluheita yhtheiskunnassa. Täälä oon kansa meän lausuntoja siittä kunka virastot hoitavat heän tehtäviä. Meän kautta ei ole aivan politiikkerillä Ruottin valtiopäivilä, mutta kansa sulla, saatavuus tärkehään informasuuhniin siittä kunka valtio toimii tänä päivänä. Tietoa jonka pääle sie saatat luottaa ja jostako sulla oon hyötyä ko sie halvaat käyttää sinun temokraattista oikeutta ette käyttää vaikutusvaltaa elikkä saaja kannatusta sinun mielipitheile.

Ko sie halvaat vaikuttaa ja muuttaa – sitä mikä sinhuun vaikuttaa.